Eng Zeitung mat Charme
Mediensplitter
Den Holtzbrinck-Verlag verkeeft den Tagesspiegel. Dat wor d’Neiegkeet, déi den 29. September fir Opreegung an däitsche Pressekreeser gesuergt huet. Dobäi war et genee dat, wat hier Konkurrenten an am speziellen dat däitscht Kartellamt zanter Méint vum Stuttgarter Mediëgrupp gefuedert hun. Nëmme jhust: Domadder as et de Proprietären vun Zeitunge wéi dem Handelsblatt an der Wocheschrëft ... Den Holtzbrinck-Verlag verkeeft den Tagesspiegel. Dat wor d’Neiegkeet, déi den 29. September fir Opreegung an däitsche Pressekreeser gesuergt huet. Dobäi war et genee dat, wat hier Konkurrenten an am speziellen dat däitscht Kartellamt zanter Méint vum Stuttgarter Mediëgrupp gefuedert hun. Nëmme jhust: Domadder as et de Proprietären vun Zeitunge wéi dem Handelsblatt an der Wocheschrëft Die Zeit nees nët gelongen, hier Kritiker ze berouegen. Et war e gellechen Iwwerraschungscoup, mat deem den Holtzbrinck-Verlag probéiert huet, eng Investitioun vu ronn 200 Milliounen Euro dach nach ze retten. Dat as de Präis, deen déi Stuttgarter Medienholding fir d’Berliner Zeitung an de Berliner Kurier op den Dësch gebliedert huet. Leider huet dat däitscht Kartellamt bei dësem Deal tëscht Holtzbrinck a Bertelsmann nët matgespillt. D’Konzentratiounswiechter wollten dësem Geschäft nëmmen dann hiere Sege gin, wann déi Stuttgarter hier aner Berliner Zeitung, den Tagesspiegel, géife verkafen. Mee dat war genee de Contraire vun deem, wat Holtzbrinck wëlles hat. D’Mediëmanager wollte béid Blieder fusionéieren, fir duerch gemeinsam kommerziell Aktivitéiten den Defizit vum Tagesspiegel ze reduzéieren. An deene gudd zéng Joer, zanter deenen hinnen dës qualitéitsorientéiert Haaptstadzeitung mat iwwerregionalem Charme, wéi hiere Chefredakter Giovanni di Lorenzo gäere seet, gehéiert, hu si eng 75 Milliounen Euro misse bäileën. Dat as quasi de Bénéfice, deen de Konzern d’lescht Joer gemaach huet – bei engem weltwäiden Ëmsaz vun 2,2 Milliarden Euro. Néirens besteet an Däitschland méi Konkurrenz tëscht den Dageszeitunge wéi zu Berlin. Alles an allem gin d’Tiragen an de Revenu aus der Publicitéit zeréck. D’Süddeutsche Zeitung an d’Frankfurter Allgemeine hun alle béid missen hier Berliner Säiten aus Käschtegrënn zoumaachen. Den héchsten Tirage an der däitscher Haaptstad an am Land Brandenburg huet mat iwwert 220.000 Exemplären d’Boulevardsblat BZ, dat genee wéi d’Berliner Morgenpost dem Springer-Verlag gehéiert. Dat selwecht gëlt fir d’Welt an d’Bild, mee béid Organer gin zu der iwwerregionaler Presse gezielt a spillen deemno keng Roll an de Kalkulatioune vum Kartellamt. Déi gréissten Abonnementszeitung as d’Berliner Zeitung, déi hiert meescht Lieser am Osten huet. Da kommen d’Berliner Morgenpost an den Tagesspiegel, déi alle béid an éischter Linn am Weste kaaft gin. D’Konkurrenzwiechter hu gefaart, Holtzbrinck kréich eng dominant Positioun um Marché vun den Abonnementsblieder, wann de Grupp gläichzäiteg den Tagesspiegel an d’Berliner Zeitung, aus däer den Erich Böhme mol eng Kéier d’Washington Post vun der Spree wollt maachen, géif kontrolléieren. Doropshin hun déi Stuttgarter Mediëmanager beim Wirtschaftsminister Wolfgang Clement eng ausseruerdentlech Autorisatioun ugefrot. D’Reaktioun vum Springer-Verlag, deen d’Berliner Morgenpost an d’Welt redaktionell schon deelweis matenee fusionéiert huet, war sec: an deem Fall géif hie séng Blieder zoumaachen. Deen nemmlechten Erpressungsversuch huet den Holtzbrinck-Verlag direkt hannendrop lancéiert. Mat dem Resultat, datt de Minister Clement d’Stuttgarter opgefuedert huet, selwer e Keefer fir den Tagesspiegel ze fannen. Den Hambuerger Bauer-Verlag huet sech gemellt. Séng Offer: 20 Milliounen Euro an eng Bestandsgarantie vun 20 Joer. Nët nëmmen huet Holtzbrinck nët ugebass; virun allem huet d’Redaktioun vum Tagesspiegel massiv géint den Editeur vu Blieder wéi Bravo an TV-Movie gemeutert. Well déi Stuttgarter engersäits keen Interessent konnten oder, wéi vill Observateure mengen, wollte fannen, an anerersäits de Minister Clement de Bréif mat engem definitiven Nee prett um Büro leien hat, huet eppes misse geschéien. A kuck een un, et huet sech iwwer Nuecht e Keefer fonnt. E Präis gouf nët genannt, an eng laangfristeg Bestandsgarantie gët et och nët; duerfir as de Keefer bei Holtzbrinck gudd bekannt, esouguer ganz gudd bekannt. De gebiertege Belsch Pierre Gerckens schafft zanter 35 Joer fir de Grupp an as virun allem um Succès vum Handelsblatt bedeelegt. Sollt d’Kartellamt iere mat dem Keefer d’accord sin, dann däerfen déi Stuttgarter d’Berliner Zeitung an de Berliner Kurier vu Bertelsmann iwwerhuelen – an enger éischter Phase. An enger zweeter Phase plangt d’Bundesreejhirung d’Kartellbestëmmungen am Beräich vun der Mediëkonzentratioun méi labber ze maachen, eventuell scho bis den 1. Mee d’nächst Joer. A wann dann de Pierre Gerckens den Tagesspiegel nees un Holtzbrinck géif zeréckverkafen, esou richteg wonnere géif dat keen. (Fräie Micro um radio 100,7 vum 1. Oktober 2003) Eng Zeitung mat Charme Den Holtzbrinck-Verlag verkeeft den Tagesspiegel. Dat wor d’Neiegkeet, déi den 29. September fir Opreegung an däitsche Pressekreeser gesuergt huet. Dobäi war et genee dat, wat hier Konkurrenten an am speziellen dat däitscht Kartellamt zanter Méint vum Stuttgarter Mediëgrupp gefuedert hun. Nëmme jhust: Domadder as et de Proprietären vun Zeitunge wéi dem Handelsblatt an der Wocheschrëft Die Zeit nees nët gelongen, hier Kritiker ze berouegen. An enger zweeter Phase plangt d’Bundes- reejhirung d’Kartell-bestëmmungen am Beräich vun der Medië- konzentratioun méi labber ze maachen. 231 54 1 Kohn, Romain Eng Zeitung mat Charme Mediensplitter Medien Deutschland Beitrag 54 forum 231Dossier Romain Kohn Mediensplitter
Diesen Artikel als PDF ansehen.
Größe: 0.13 MB
