Mobilitéit – Léisunge fir Lëtzebuerg mat der Wuesstemsfro am Hannerkapp
ADRenalin – déi jonk ADR
Lëtzebuerg stécht am Stau! Zu de Spëtzestonnen ass de Verkéier zu Lëtzebuerg zu enger reegelrechter Plo ginn. Dës Tatsaach ass u sech kaum verwonnerlech, wann ee bedenkt, wat fir eng enorm Belaaschtung de stramme Wuesstem op eist Verkéiersnetz duerstellt: Wa mer weider esou wuessen, wäerten sech schonns a fënnef Joer ronn 100.000 Leit méi am Land beweegen. De finanzielle Gewënn, deen den héije Wuesstem geréiere soll, geet net eemol duer, fir d’Nofolgekäschte vum stramme Wuesstem, wéi z.B. d’Investitiounen an Infrastrukturen, ofzedecken. D’ADRenalin erënnert drun, datt de Mobilitéitsproblem ontrennbar mat der Wuesstemsfro verbonnen ass: Verstoppte Stroossen, vun engem Schantje bei den aneren, iwwerfëllte Busser an Zich, déi seele pünktlech sinn. Alles dat sinn d’Konsequenze vum stramme Wuesstem. Besonnesch als Jonker hu mir all Interêt, Léisunge fir de Verkéierschaos ze fannen, well mir eis och no Joren a Joerzéngten nach an engem Ëmfeld vun der héijer Liewensqualitéit beweege wëllen.
Ëffentleche Verkéier, mee keng Zwangsmoosnamen
Als ADRenalin ënnerstëtze mir d’Iddie vun eiser Mammepartei, déi bei der Mobilitéit keng ideologesch Politik féiert. Esou soll de Bierger net duerch Zwangsmoossnamen (Aféierung vun enger Maut, drastescht Reduzéiere vun den ëffentleche Parkplazen) dozou gezwonge ginn, op den Auto ze verzichten. Mir wëlle keng Zwangserzéiung vum Bierger. D’ADRenalin plädéiert fir eng gesond Mëschung tëscht ëffentlechem Verkéier an Individualverkéier. Och déi douce Mobilitéit (Persouneverkéier, Vëlosverkéier …) wëlle mir fërderen: Wann eng nei Strooss gebaut gëtt, soll direkt ëmmer e Vëloswee mat ugeluecht ginn. D’ADRenalin wäert sech dofir asetzen, den ëffentlechen Transport méi attraktiv ze gestalten: Mir fuerdere schonns zanter laangem de Gratis-Ëffentlech-Transport fir jiddereen. Dëst ass eng couragéiert Moossnam, fir den ëffentlechen Transport fir all Bierger méi attraktiv ze gestalten. Wann een sech ukuckt, firwat d’Regierung alles Suen aus der Fënster schmäisst, wär dëst eng Moossnam, wou d’Finanzéierung muss méiglech sinn, wann een déi richteg Prioritéite setzt. D’Eisebunn ass ee vun de wichtegsten ëffentlecht Verkéiersmëttel, dohier fuerdere mir, datt mam néidegen Opwand an den Ausbau vum Schinnenetz investéiert gëtt.
City-Tunnel a 4 Spuren op der gesamter Nordstrooss
D’ADRenalin erënnert drun, datt d’Léisung vum Mobilitéitsproblem awer net an enger eenzeler Moossnam leie kann, mee an der Kombinatioun vu ville méigleche Mesuren. D’ADRenalin wëll eng gesond Diversitéit am Verkéier erhalen. Dobäi sollen d’Verkéiersmëttel ëmmer och esou adaptéiert sinn, datt se den Ufuerderunge vun de méi vulnerabele Matbierger (z.B. eis eeler Matbierger oder Matbierger, déi een Handicap hunn) gerecht ginn. Eng weider Mesure, fir de Verkéiersproblem ze léisen, ass d’Iddi vun der ADR, e City-Tunnel op d’Been ze stellen. Mir sinn iwwerzeegt, datt den Tram net d’Léisung fir de Verkéiersproblem ass, mee eng onsënneg Mesure, déi méi Problemer schaaft, wéi se der léist. Sollt Lëtzebuerg wieder sou onmoosseg wuessen, kann dofir nëmmen de City-Tunnel de Problem léisen: De Stater Sandsteen eegent sech besonnesch gutt dofir, en ënnerierdescht Schinnennetz op d’Been ze stellen, dat d’Haaptachsen, souwuel vun der Stad Lëtzebuerg, wéi och vum Land, matenee verbënnt. Esou wär d’Stad un der Uewerfläch endlech e verkéiersberouegte Raum, wat alle Leit eng wesentlech méi héich Liewensqualitéit bidde géif. Laangfristeg ass de City-Tunnel déi beschte Léisung fir eist Land, a Lëtzebuerg wäert sécherlech net derlaanscht kommen, dës ADR-Iddi nach ze diskutéieren. D’ADRenalin fuerdert och, datt endlech déi gesamt Nordstrooss op 4 Spuren ausgebaut gëtt. Fir d’ADRenalin ass de Norden net d’Stéifkand vum Land. Als President vun der jonker ADR wäert ech et net verpassen, d’Debatt ëm d’Mobilitéit weiderhi ganz opmierksam ze suivéieren an eis Iddie konsequent an d’Diskussioun matanzebezéien.
Als partizipative Debattenzeitschrift und Diskussionsplattform, treten wir für den freien Zugang zu unseren Veröffentlichungen ein, sind jedoch als Verein ohne Gewinnzweck (ASBL) auf Unterstützung angewiesen.
Sie können uns auf direktem Wege eine kleine Spende über folgenden Code zukommen lassen, für größere Unterstützung, schauen Sie doch gerne in der passenden Rubrik vorbei. Wir freuen uns über Ihre Spende!
